Meer oor Marieke

“Dis net genade, dat ek hier mag staan – voor U troon, en opkyk na bo.” (woorde uit lied: Ek is niks) Dit is hoe ek voel oor die bediening wat die Here aan my toevertrou het: DIS NET GENADE!

Ek het as eerstejaar argitektuur student my lewe aan Jesus oorgegee. Deel van my kommunikasie met my Verlosser en Vader was en is om musiek vir Hom te skryf. Nadat ek en my man as predikantspaar in ‘n gemeente aangestel is, het ek my begin uitleef in ons gemeente se musiekbediening en geniet dit steeds terdee. Ek is altyd so opgewonde om ‘n nuwe lied met my gemeente te deel en hulle so te bedien. Baie mense het my destyds gevra hoekom ek nie ‘n cd maak nie. Ek was egter oortuig dat ek nie iets moet doen net omdat ek kan nie, maar dat so iets net aangepak moet word as die Here baie duidelik opdrag daarvoor gee. So het dit gebeur dat die Here op ‘n dag baie duidelik vir my gese het dat my musiek verder geneem moet word. Na ‘n lang worstelstryd, wat uitgeloop het op nog ‘n oorgawe en duidelike bevestiginge van die Here, het ek begin met die produksie van my eerste cd – AAN U VOETE, wat in 2007 uitgegee is. My tweede cd – VOOR U TROON het, deur die Here se groot genade in 2009 die lig gesien. My derde cd – HIER OP MY KNIEE, is in Oktober 2012 vrygestel. Wat ‘n groot voorreg om na 10 jaar (2017) ‘n vierde cd – IN U TEENWOORDIGHEID te kon vrystel. Met aanvang van hierdie cd het die Here vir my gesê dat om musiek op te neem, deel van my pakket is, hoe hy my aanmekaar gesit het. Ek is tans (2019) besig met skryf en opnames vir my volgende cd – U ALLEEN. Mag jy geseën word deur hierdie musiek, en mag dit vir jou inspireer om nog meer tyd in Sy teenwoordigheid te spandeer.

Marieke praktiseer voltyds as professionele argitek in Bloemfontein. Sy bedien haar musiekbediening vanuit haar plaaslike gemeente.